Minister Xiomara Maduro ta un persona spiritual, mama, yiu, un profesional, ademas di ta un mandatario carismatico cu un positivismo captivador. Como Parlamentario su atencion riba maneho financiero tabata uno critico a base di comunicacion claro.

Den su carera Ministerial e la demostra su dedicacion pa traha di curason y cu caracter firme pa beneficio di Aruba, enfrentando e retonan fuerte di e carteranan di Finansa, Asuntonan Economico y Cultura.

Famia

Xiomara su forsa ta Dios y su sosten ta su mayornan Alcida Maduro-Ras y Antonio Maduro (q.e.p.d). Danki na nan esfuerso pa su educacion y preparacion e ta e persona cu e ta awe. Su motibo pa sigui padilanti tur dia ta su yiu homber, Ethan Ruiz cu e sa di dedica hopi tempo na dje apesar di su agenda druk.

Educacion

Como mucha di Pabou ela disfruta di su educacion for di kleuter te cu su añanan na La Salle College, pa despues sigui su trayectoria educacional na Colegio Arubano, unda e la logra ambos diploma di HAVO y VWO. Den su añanan di educacion profesional na Hulanda e la completa su Bachelor’s Degree den Economia na Hogeschool van Arnhem en Nijmegen. Despues e la sigui na Universiteit van Groningen, unda e la obtene e titulo ‘Meester in de Rechten’ den ‘Bedrijfsrecht’.

Carera Profesional

Despues di esaki e la bolbe Aruba pa sirbi como Funcionario di Maneho (Beleidsmedewerker) na Meldpunt Ongebruikelijke Transacties (MOT), na unda ela labora pa 6 aña. Tabata eynan unda su Abilidadnan y e pasion cu cual e tabata haci su trabou, a pone cu ex Minister President Nel Oduber a mira den dje capacidad pa ta un bon politico y asina ela wordo acerca pa subi lista di MEP.

Carera Politico

Despues di a consulta cu su famia ela tuma e reto, ya cu e ta identifica cu ideologia di partido MEP. E decision aki a hiba cu na aña 2009 ela asumi e funcion di Miembro di Parlamentario den cual ela sirbi 8 aña, pa luego sirbi den e funcion di Minister.